A peli do día

Sábado, 12 de Novembro de 2005

Muxía, Politica na Costa da Morte

Verbena, bocadillo e Virxe da Barca.



2003. Dirixe Ricardo Llovo. Produce Zopilote, empresa dedicada ata o momento ó desenvolvemento e escritura de guións e que no seu momento, cando menos algúns deles foron parte activa de Burla Negra.
O título xa o di todo. O docu conta as primeiras eleccións celebradas en Muxía despois da catástrofe do Prestige. Arranca coa pegada de carteis e remata co reconto. Entre medias vemos a situación da xente desta zona 0 e se nos presentan algunhas claves da política galega dos últimos anos.
Persoalmente, penso que é un documental moi digno, correcto e que se deixa ver, aínda que ten algúns problemas. En algúns momentos faise redundante e vemos opinións repetidas en distintos momentos da fita, eso provoca que falle algo o ritmo e en determinados momentos quede algo longo. Por outra banda, é un documental só entendible na Galiza. "Muxía", non fai ninguha descripción da situación, non fala case do Prestige e sírvese da información que a xente xa ten para arrancar o seu relato. Esto provoca que cando alguén de fora ve este docu, non se entere de nada.
Por outra banda, este documental ten secuencias absolutamente gloriosas, cun sentido do humor amargo. A aparición de Fraga nas festas da Virxe da Barca é absolutamente xenial. O arranque coa pegada de carteis é máis que atractivo, e hai algunhas declaracións de señores da zona que non teñen desperdicio.
A mensaxe é bastante pesimista. O sentimento que che queda despois de ver "Muxía" é fundamentalmente de rabia e de pena. A pena polas persoas comprometidas nas que podes apreciar o seu sufrimento, a rabia por quenes antepoñen o materialismo á vida, maioría (absoluta), e que é imposible comprender a súa lóxica.

Desde aquí recomendamos o seu visionado. Vaise emitir no espacio Galicia Documental da TVG (Tódolos Sábados entre 15.30-16.00 h. Uns días comeza antes e outros máis tarde). Non estou seguro pero creo que o van emitir o vindeiro sábado 19N coincidindo co aniversario.

Nota: 5

Por: Fagot | Documentais | Comentarios (2) | Referencias (0)