A peli do día

Mércores, 21 de Decembro de 2005

A Xunta prepara un baremo para definir ó audiovisual galego

A Xunta vai elaborar un baremo para regular as axudas á produción audiovisual contando, por primeira vez, co sector. Os responsables das tres áreas do Goberno galego con competencias neste ámbito chegaron onte ao que pode entenderse como un principio de acordo para avanzar entre todos na concreción do modelo. Vai ter tres liñas de actuación fundamentais e pretenden que estea definido moi axiña, porque queren que regule a convocatoria de axudas á produción do 2006, que globalmente ascenderán a cinco millóns de euros.
O director xeral de Comunicación Audiovisual, Manuel Fernández; o director da TVG, Xesús Iglesias; e o asesor na materia da Consellería de Cultura, Manuel González, expuxéronlles onte pola mañá aos profesionais que participaron no Foro Academia Aberta as liñas mestras do modelo que propoñen aplicar de acordo con todas as partes implicadas «para conseguir que o sector audiovisual galego medre e que se amplíe o campo de actuación a novos creadores con talento». Non presentaron unha proposta pechada, nin sequera un borrador, senón os principios dun baremo conxunto «para traballar de xeito coordinado e sinérxico na cadea de valor», á hora de intervir, dende a perspectiva pública, en todas as partes do proceso dunha produción audiovisual. O obxectivo do baremo non é outro que o de clasificar as peticións para que as axudas repercutan no tecido industrial e de construción do símbolo de marca de produción galega.
Manolo González fixou os cinco principios claves para determinar a produción galega: garantir o principio de igualdade de oportunidades, transparencia absoluta na xestión, fortalecemento do tecido produtivo e profesional galego, aposta polo talento e potenciación dun audiovisual con identidade e miradas propias dende Galicia.
Están todos de acordo en que os criterios para o previsible baremo teñen que ser obxectivos dende o punto de vista profesional, do mercado e da identidade. De aí que tamén quedara claro que se abrirán tres liñas de participación.
O director da TVG anunciou un esforzo especial para a difusión de curtametraxes, cun espazo para novos creadores. No mesmo sentido, a Consellería de Cultura vai apostar pola produción de curtas en formato dixital.
primeira liña de axudas do baremo será para producións maioritariamente galegas, e será determinante o capital, que sen estar fixado podería requirir que máis do 50% fose galego, e o uso do idioma galego, coa rodaxe co son directo neste idioma.

A segunda liña será para producións que en vez do idioma opten polos profesionais galegos, o que requirirá que os xefes de equipos técnicos sexan galegos ou que leven residindo en Galicia polo menos dous anos. En calquera caso, terán que entregar unha copia do produto dobrada ao galego.

A terceira liña do baremo de axudas será para producións minoritarias galegas, coproducións. En calquera dos casos, diferenciarán as axudas para animación.
Os actores e actrices elaboraron un documento que presentarán á Xunta e a TVG no que, entre outras cousas, reclaman que se elabore un baremo, «incluso se é malo». «Como non hai ningún, contar cuns criterios que sexan públicos e transparentes será un gran paso», explica Monti Castiñeiras, coordinador da xornada de debate organizada pola Asociación de Actores, Directores e Técnicos de Escena, coa televisión, a dobraxe e o cine como temas en tres mesas.

Nas conclusións, ademais de reivindicar o baremo que defina que é unha produción galega, destacan a reclamación de promoción para o audiovisual galego, partindo da afirmación de que «é exportable, pero non o consegue por falla de vontade e promoción suficientes por parte da Xunta e das produtoras». E piden un control das subvencións públicas, habida conta, segundo os actores, de que as produtoras teñen unhas marxes de beneficio de máis do 20%, e ata do 40%, «sen que se saiba onde van parar os cartos públicos».

A maior participación nas producións de actores e actrices galegas é unha condición básica para o colectivo, así como que se aposte polo público xoven á hora de crear produtos tanto televisivos como cinematográficos e en calquera formato.

Noticia recollida en "La Voz de Galicia" o día 18-12-2005

Por: Fagot | Institucións | Comentarios (2) | Referencias (0)