A peli do día

Luns, 23 de Xaneiro de 2006

Arranca a era Cermeño na TVG

A nova xefa de programas enfrontase a un panorama marcado pola desaparición de programas cun enorme peso na audiencia, a incorporación de novos contidos culturais, a incognita das novas series de ficción, e a dura proba do 17%.

Os cambios políticos non son efectivos ata que non ocupan o seu posto tódolos responsables pertinentes. Así, é un feito innegable que desde as pasadas eleccións a política de programación da TVG andivo algo á deriva acusando falta de planificación. (Rectifico esto, xa que como nos apuntaba Ave, a dirección de programación ocupaa Eduardo Galán).
A pasada semana facíanse os nomeamentos pertinentes para que a política da TVG comece a andar. Por unha banda, Ana Cermeño como nova xefa de programas, pola outra Nuñez Feijoo como novo lider do PP de G, algo que como afirma o Xornal tiña ós membros do PP recolocados na TVG á expectativa e na procura da que serán as súas liñas de actuación nos vindeiros meses.
A realidade é que o panorama que se presenta non é nin moito menos sinxelo para a recén chegada. É certo que a TVG foi branco de numerosas críticas durante o goberno popular. Falábase dunha televisión anclada no pasado, que non ilustraba a realidade galega, que as informacións eran sesgadas e partidistas e que os seus contidos "non obedecían" ás demandas dos galegos. Probablemente non lles falte razón a moitos dos que pensaban esto. Agora ben, se botamos unha ollada ós datos de audiencia, a TVG sempre andivo nun confortable 17% de audiencia media sendo lider varios días da semana en distintas franxas horarias. Esto dá a impresión de que o anterior consello directivo da TVG marchou coa sensación de traballo ben feito, salvo as críticas recollidas, e de feito tódolos "antigos xefes" sairon do ente con curriculum de "grande profesional".
Este 17% de media é unha arma coa que deben estar a relamberse os dirixentes do PP con vistas a futuras sesións de control ó goberno. Baixar desta media é algo moi doado, mantela é un traballo moi duro, e superala é algo que polo momento semella imposible, especialmente cando xa se fixo pública a débeda da TVG e cando o horizonte da TDT implica unha reducción irremediable de audiencia.
Con esto como telón de fondo, o cambio de imaxe da TVG comezou a facerse efectivo no pasado nadal aínda que o máis normal é que non se complete ata setembro deste ano, onde se prevee que mude ata a imaxe corporativa.
As primeiras novidades foron algo así como os cambios de castigo. Desapareceron da grella programas como "Encontros" e "Supermartes" e é máis ca un rumor que "Luar" podería ter o seu tempo contado unha vez que rematen contrato. Sen embargo, todos estes programas contaban cunha audiencia consolidada.
Por outra banda, a grella abriuse a novos horizontes culturais que salvo en casos concretos tampouco supuxeron un cambio substancial. A pasada semana anunciabase a estrea de Miraxes, unha revista cultural que salvando as distancias recorda a "Con C de cultura". Por outra banda, tanto Planeta cine como Onda Curta, non deixan de ser o mesmo que eran Dezine e Curtametraxe Galega, só que con caras novas e a partires das mesmas horas desorbitadas, as 12 da noite dos domingos. No eido cultural a única aposta forte foi Galicia Documental, que era anunciada como un intento de dignificar a televisión coa emisión de documentais. Sen embargo, e despois de varias emisións con audiencias respetables, e incluso algunha moi boa, a audiencia caeu en picado e o programa ten semanas nas que non supera un pobre 5%.
E despois está a ficción. O eido no que sempre destacou a TVG e que tivo mellor acollida entre o público. De momento, este apartdo da programación ten unha serie que funciona actualmente como buque iinsignia, está é Libro de Familia, a serie de CTV da que descoñezo cal foi a audiencia do episodio de onte, pero que hai unha semana fixo un 27,9% de media o que a confirma como lider indiscutible das noites dos domingos por riba de series como "7 vidas" na súa nova tempada. E ante esto, a nova serie de Voz Audiovisual, A vida que che espera, que segue a ser unha incógnita, xa que se ben a súa primeira emisión contou cun meritorio 24% de audiencia haberá que ver como reacciona a xente nas próximas semanas.
Sumado a esto, hoxe comeza o programa "Feito en Galicia" a primeira incursión do cinema, en Prime Time na TVG desde hai xa unha morea de anos. Creo que a última vez foi cando se programaban filmes de terror os luns á noite con aqueles filmes do estilo "O Incobo". Vexamos que tal sae. A realidade deste programa é que hoxe emitirá "Os luns ó sol" que é probable que teña audiencia, pero se antendemos á realidade do cinema feito en Galiza, dentro de 4 ou 5 meses estarán obrigados a emitir "Sempre Xonxa" e despois como moito algunha proxección de Roger Corman nos anos 70 ou filmes de Amando de Ossorio que terán que dobrar do alemán, xa que probablemente non atopen outra copia. Sinceramente a "Feito en Galicia" non lle teño esperanza nin de duración, nin de público a non ser que a TVG se decida a participar en produccións galegas serias con vistas ós próximos 10 anos.
En resumo, así está a cousa que todavía se vai complicar máis coa futura posta en marcha da segunda canle. O principal problema da TVG é ó meu xuizo, o problema que ten toda canle nova, quere ofrecer algo pero non conta con contidos para facer efectiva esa oferta. Agardemos que non se volvan tolos e que con calma a nosa canle evolucione e gañe en calidade.

Máis información en noticias:

A nosa terra. Nova programación da TVG
Galicia Hoxe. A TVG abre o ciclo Feito en Galicia

Por: Fagot | Televisión | Comentarios (6) | Referencias (4)