A peli do día

Domingo, 12 de Febreiro de 2006

Pórtico levará ó cine a última novela de Perozo

Información de Galicia Hoxe

A productora Pórtico Comunicación adquiriu os dereitos da última novela do escritor estremeño-galego José Antonio Perozo, Atrapados en Riparia, e xa conta cun guión escrito que se rodará dentro duns meses.
A novela, publicada por ALGAR, do grupo valenciano Bromera, "xira arredor da reivindicación da memoria", explicou o autor. "Os auténticos protagonistas da historia, despois de mortos, permanecen atrapados en Riparia –explicou Perozo, onde no ano 1936 se produciron uns acontecementos tráxicos e lutuosos dos que foron vítimas".
"Unha serie de persoas morreron como consecuencia dos odios, envexas e intereses que desataron a Guerra Civil. Uns personaxes que se negan a que a súa historia permaneza enterrada pola Ditadura de Franco e o posterior caciquismo que pervive na transición democrática na Galicia da era Fraga", desvela o escritor de Llerena (Badaxoz) establecido en Compostela.
Preguntado por Riparia, sinalou que se trata de "unha illa imaxinaria situada fronte a unha ría galega". En realidade, agregou, Riparia "é unha metáfora de moitas realidades que aconteceron antes e durante a Guerra do 36, que posteriormente a historia oficial tratou de as sepultar".
Sobre a recuperación da memoria que agora se pretende, coincidiu que "agora estamos a vivir momentos de recuperación da memoria histórica dese pasado recente que atormentou ás nosas maiores, esta novela é unha achega a ese interese polo pasado que marcou as nosas vidas aínda que non o vivísemos".
José Antonio Perozo opinou que "en Galicia, ata hai uns meses non saímos dese pasado, non nos desprendemos do tardofranquismo que representaba Manuel Fraga ata as últimas eleccións. E aínda máis -insistiu-, no Partido Popular que dirixen Rajoy, Acebes e Zaplana segue existindo a semente da hipocrisía e a mentira que a miña novela denuncia. Riparia, xa que logo, está en Galicia e en calquera recuncho de España. Está, mesmo, na realidade política que estamos a vivir agora". Así, a ficción se emprega para narrar a realidade. "Atrapados en Riparia -di o seu autor- é ficción, pero todos os elementos, ata os aparecidos, forman parte do teatro da vida, da realidade máis tanxible".
Perozo considera que non escribiu unha novela de ciencia ficción, "nin sequera -dixo- unha novela esotérica, aínda que pode participar dos dous xéneros. Esta é unha narración moi realista na que o personaxe chega a temer pola súa estabilidade mental, pensando mesmo que padece un problema de esquizofrenia".

"Temos máis medo ca respecto"

Respecto á "necesidade de seguir dándolle voltas á Guerra Civil", Perozo sostén que "o franquismo durou demasiado tempo e conseguiu pór sobre as verdades unha lousa tan pesada como a do Escorial sobre Franco e José Antonio". Entende que, "se os americanos ou os franceses tivesen unha guerra como á nosa, coas súas atrocidades, historias magníficas, heroísmos e miserias, estaríamos invadidos polas súas historias de ficción, ensaio, cine, documentais". "Aquí, polo contrario -concluíu- seguimos tendo máis medo que respecto ó acontecido, segue pesando a mala conciencia da Igrexa e os fillos dos vencedores teñen nas súas mans os poderes fácticos", polo que "non resulta doado recuperar a memoria nin desde a esquerda nin desde a imparcialidade".

Por: Fagot | Cinema | Comentarios (4) | Referencias (0)