A peli do día

Martes, 07 de Marzo de 2006

E esto como se come?

Varios xornais confirman que o CGAI quedará baixo a tutela da Consellería de Presidencia nas semanas previas a que se publiquen as axudas ó Audiovisual por parte da Consellería de Cultura.

Hoxe despertábamos coa seguinte nova publicada por Vieiros:

A Presidencia da Xunta queda finalmente co CGAI

[07/03/2006 12:04] Logo de sete meses de pugna entre a Consellaría de Cultura e a Secretaría Xeral de Comunicación -dependente de Presidencia-, Fernando Salgado conseguiu ao final que o Centro Galego das Artes da Imaxe (CGAI) pase a depender do seu departamento, malia haber un acordo previo polo que esta entidade nun principio quedaría ao abeiro da consellaría de Cultura. O BNG perde así un importante foco de poder na política audiovisual, dado que os dous partidos tiñan plans para facer deste organismo un buque insignia do sector. De feito Presidencia prevé sacar nos próximos días un decreto coa actualización das funcións do CGAI, aínda que de momento non se prevé a substitución do actual director, José Luis Cabo.

A historia do reparto da política audiovisual remóntase ao pacto de Goberno entre PSOE e BNG, polo que a Dirección Xeral de Comunicación Audiovisual pasaba de Cultura a Presidencia, e con ela en teoría os seus órganos adscritos, como o Consorcio do Audiovisual de Galicia e o CGAI. Por outro lado Cultura reservábase "unha consignación económica para axudas á creación, producción e divulgación cinematográfica, videográfica, audiovisual e multimedia, sen prexuizo das axudas que poida conceder a Secretaría Xeral de Comunicación ou a CRTVG". Malia isto, Cultura mantivo dende aquela a intención de que o CGAI volvese ao seu departamento, toda vez que o candidato de consenso a dirixilo, Manolo González, ía ser tamén o asesor desta consellería en materia audiovisual. E o certo é que ao final non puido conseguilo e, logo de que a Xunta por fin decretase o pasado xoves a estrutura orgánica da Presidencia, o CGAI fica definitivamente adscrito á banda socialista do goberno, tal e como lle confirma hoxe Fernando Salgado ao xornal Galicia Hoxe.
Dende a secretaría xeral de comunicación non lle queren dar maior importancia ao feito de que o CGAI fique en Presidencia e remítenese ao acordo de Goberno, no que xa se daba por feito. En Cultura de momento tampouco farán declaracións ao respecto, así que polo de pronto o que veremos nas vindeiras semanas é cómo os dous departamentos acaban de definir as súas competencias e as liñas que porán en marcha para as axudas ao audiovisual. Nese sentido Cultura está a piques de sacar a convocatoria das axudas á produción e ao desenvolvemento de proxectos, nas que se prevé ademais un aumento importante da partida para axudas a curtametraxes, nas que colaborarán as secretarías de Xuventude e Igualdade, integradas na Vicepresidencia da Xunta, tamén do BNG.
O que si parece claro é que esta victoria dos socialistas na loita polo CGAI permitiralles manter a cota de protagonismo adquirida nos últimos mese en materia cultural. Un exemplo diso foron as xestións realizadas por José Luis Cabo, actual director do CGAI e máis próximo a Salgado, para que a primeira muller de Cortázar cedese á Xunta boa parte do seu patrimonio audiovisual, unha cesión que se escenificou en París con Touriño ocupando as primeiras planas dos xornais.
____________________________________________________________

Paralelamente, o xornal Galicia Hoxe, publicaba o seguinte:

Salgado quere facer do CGAI buque insignia do audiovisual

Con calma. Tras asegurarse finalmente o control do Centro Galego das Artes da Imaxe, o secretario xeral de Comunicación, Fernando Salgado, non ten présa por operar cambios na súa dirección, que polo momento seguirá ocupando José Luis Cabo.
Salgado confirmou onte que, ao aprobarse o decreto sobre a estructura da Presidencia, o CGAI fica definitivamente adscrito á banda socialista do goberno, pero rexeitou aventurar o nomeamento dun novo responsable.
O certo é que nos máis de sete meses de tirapuxa coa Consellería de Cultura polo organismo máis desputado do bipartito, o equipo de Touriño non deu mostras de inquietude por relevar do seu posto ao director do CGAI, como se procedeu co resto de institucións dependentes da Xunta.
De feito, foi José Luis Cabo quen lle serviu en bandeixa á Presidencia da Xunta unha oportunidade de ouro para facerlle fronte á conselleira Ánxela Bugallo nesa sorte de pugna que manteñen polo protagonismo en materia cultural. O director do CGAI foi quen realizou as xestións que permitiron que a primeira muller de Cortázar, Aurora Bernárdez, cedera a Galicia o legado fotográfico e fílmico do escritor arxentino, que se atesoura agora no propio centro coruñés.

De súpeto, nas portadas dos diarios

Cando o pasado decembro Emilio Pérez Touriño viaxou a París para recoller este material, non só conseguía un tanto sobre Bugallo, senón que ademais lograba levar ás portadas dos xornais un organismo que permaneceu en segundo plano desde a súa creación en 1989.
O interese do presidente da Xunta e do Secretario Xeral de Comunicación por facerse co control do Centro Galego das Artes da Imaxe resulta sintomático da intención do novo goberno de convertelo en buque insignia do estratéxico sector audiovisual galego.
O Centro Galego de Artes da Imaxe foi fundado pola ‘administración Fraga’ coa misión da recuperación patrimonial do audiovisual e participación na promoción galega en mercados, feiras e festivais.
Está previsto que nas vindeiras semanas o Consello da Xunta aprobe a actualización mediante un decreto a creación e funcións deste centro, como fixo a semana pasada co Consorcio Audiovisual de Galicia, organismo transversal que tamén preside o secretario xeral Fernándo Salgado .

Un candidato que perdeu peso

Anque até hai preto dun mes se daba por feito que Manuel González sería o próximo director do Centro Galego das Artes da Imaxe, esta posibilidade dáse agora case por desbotada. Era o seu un nome de consenso que, sen embargo, pasaba pola adscrición do CGAI á Consellería de Cultura, onde González é asesor en materia audiovisual. Varios factores xogaban, sen embargo en contra do ex director da Escola Galega de Imaxe e Son, vencellado profesionalmente á productora Dygra. Un deles é que elaborara o programa de política audiovisual tanto para o PSdeG como para o BNG. E, por outra parte, fora cualificado polo anterior conselleiro de Cultura na súa despedida, o ‘popular’ Xesús Pérez Varela, como un dos seus mellores colaboradores en asuntos do audiovisual.
____________________________________________________________

Está claro que a política é moi complicada e na maioría dos casos non se rixe pola lóxica que nos reximos o resto do humanos. Persoalmente, non vou ser eu quen se posicione a favor dun grupo parlamentario ou outro, pero como parte interesada no sector audiovisual galego non deixa de parecerme extremadamente ridícula unha situación na que:

A Cosellería de Cultura otorgará: ""unha consignación económica para axudas á creación, producción e divulgación cinematográfica, videográfica, audiovisual e multimedia".

A Consellería de Presidencia: "Reservase o dereito a conceder as súas propias axudas"

O Consorcio Audiovisual, o máis importante organismo en materia de divulgación e promoción de contidos audiovisuais: Queda en mans da Consellería de Presidencia.

O CGAI, "o buque insignia do audiovisual": Queda finalmente en mans de presidencia e "Presidencia prevé sacar nos próximos días un decreto coa actualización das funcións do CGAI" (Despois de 7 meses).

A CRTVG: En terreo neutral.

Como se come esto na práctica? Será que si Cultura non me subvenciona me poderá subvencionar Presidencia? Será que no Consorcio terán prioridade as produccións subvencionadas por Presidencia? Será que non se sabe que facer co CGAI pero que conta cunha grande partida orzamentaria? E a CRTVG, entrará en coproduccións subvencionadas por Presidencia ou por Cultura? Poderanse recibir subvencións de dúas consellerías? Xa postos, non hai subvención de industria? E as licencias de TDT? Serán axudadas por Cultura, por Presidencia, ou será a TVG quen subvencione á súa propia competencia?

O que máis gracia me fai é a excusa completamente estúpida de poñer o "legado de Cortazar" como punto de inflexión no futuro do CGAI. O legado de Cortazar son catro rollos de película de 8 mm que ata o momento non veu ninguén que dubido que vaian ser proxectadas e que o único que pintan nesta historia é certificar o que foi a labor do CGAI nestes anos, un galpón onde se amontonan cousas sen uso.

O único que me queda claro é que estamos nun sector que ten que espabilar e deixar de facer servilismo ó partido que goberne, porque a evidencia nos dí que os que van levar as axudas este ano son os mesmos que antes as levaron coa administración Fraga. Se tanto se fala de sector extratéxico non entendo porque nin sequera se intenta unha unificación de criterios para levantar esta industria que está a sufrir máis freos polas distintas actuacións políticas que pola propia dificultade da creacción.

A maior utopía, agora que xa tódalas cartas están sobre a mesa, é que desde as consellerías (tanto unha como outra) se nos diga a verdade de que se quere facer coa nosa pequena industria xa que os traballos que están en xogo son os nosos e non os deles. Aínda vai resultar que despois dun "Hai que Botalos" o audiovisual galego terá que rodar un "Que volva Fraga" para que alguén se decate de a quen están perxudicando.

Arquivo Histórico sobre o tema:

Primeira caza de bruxas no audiovisual.
Mutismo en el audiovisual
Pacto para que o BNG controle o CGAI
A sombra de Pérez Varela sobre Manolo González
Manolo González ten perdida a batalla polo CGAI
O CGAI almacenará o legado cinematográfico de Cortazar.

Por: Fagot | A Debate | Comentarios (4) | Referencias (1)