A peli do día

Mércores, 10 de Maio de 2006

Caso "CGAI" e as bobinas de Cortazar

Varios xornais aportan máis datos sobre o futuro do Centro Galego de Artes da Imaxe e sobre a súa dirección.

Con certo tufo a chapuza e sen que exista todavía ningún tipo de comunicado oficial sobre o futuro do CGAI, varios xornais informan de que previsiblemente se fará publica a solución do caso (que aínda non parece ser definitiva) durante a rolda de prensa que vai celebrar o Secretario Xeral de Comunicación, Fernando Salgado para anunciar os actos e actividades que se van organizar en torno ó "legado cinematográfico" de Julio Cortazar que foi doado pola súa viúva a este centro galego.
A nós non nos queda dúbida que se Cortazar vivise ben podería escribir un deses seus relatos entre o cotidiano e o surrealismo falando exclusivamente das súas "bobinas" que nos últimos meses cambiaron de cor e de partido e serviron de abandeiradas a uns e a outros como xustificación dun centro inoperante pero con partida orzamentaria suficiente como para ser desexado.
O CGAI é como un dos "ringsides" bonaerenses que nos describía o narrador, onde todos se pegan, onde a xente vai co gañador e onde o premio que nos amosan son unhas cantas horas de filmación dun narrador glorioso que quizais teña algo de valor documental pero o seu valor fílmico é probable que non vaia máis alá da viaxe de bodas filmada por Pamela Anderson e Tommy Lee.
Sen embargo, as bobinas de Cortazar están ata na sopa e sen moverse do sitio aparecen como único referente común e como testemuña de excepción a todo o que acontece no CGAI. Se esas bobinas falasen igual lles entraba ganas de imolarse como as bovinas da VA-CA.
Primeiro, cando o CGAI era sinónimo de loita entre o PSOE e o BNG polo control, as bovinas aparecían como principais aliadas do anterior director José Luís Cabo, sen embargo as caprichosas bobinas cambiaron de parecer e Cabo foi cesado do seu cargo. O seguinte en ser "case nomeado" foi Antonio Simón, que na páxina da Xunta, se anuncia o seu nomeamento, como ven sendo habitual neste goberno, para a próxima semana. Sen embargo, semella que eso tampouco vai ser así non sabemos se pola colección de débedas que nos comenta o xornal Galicia Hoxe, ou simplemente por outro antollo das bobinas.
O caso é que o xornal La voz de Galicia, publicaba hoxe que o próximo en facerse cargo da dirección é Jaime Pena: "Jaime Pena é, ata agora, o responsable de programación do CGAI, posto que desenvolveu durante toda a etapa de José Luis Cabo á fronte da filmoteca galega e que en certo sentido podía ser considerado o segundo deste centro, aínda que non existira como tal este posto no organigrama do CGAI.
Segundo algunhas fontes da institución autonómica este nomeamento tería carácter provisorio en tanto Comunicación non toma unha decisión definitiva sobre a dirección e para saír da situación de temporalidade na que entrou esta institución nos últimos meses, primeiro como resultado da pugna entre Presidencia e Cultura para adscribir este centro aos seus respectivos organigramas e despois tralo falido nomeamento de Antonio Simón para substituír a José Luis Cabo."
Curiosamente, esta resolución como o descarte de Antonio Simón faranse diante das bobinas do poder, mentres se nos advirte, gracias pola deferencia, que o nomeamento de Jaime Pena será transitorio. Dame a impresión de que eso xa todos o sabíamos.
Mal fario teñen esas bobinas, ou moito sarcasmo gardan nas súas latas, eu desde agora vou comezar a tocar madeira se nalgún momento se me achegan as bobinas de Cortazar.

Por: Fagot | Institucións | Comentarios (2) | Referencias (0)