A peli do día

Sábado, 13 de Maio de 2006

Estrease "Cabodomundo" a primeira serie de televisión comunitaria

Información de Vieiros

O Hotel Mogay de Chantada foi o lugar elexido polo colectivo Cabodomundo para a presentación da serie que leva o mesmo nome: os protagonistas- os personaxes de ficción e os actores que os encarnan- presentaron o proxecto de xeito oficial, e desde a súa experiencia de primeira man. O Colectivo Musical Autónomo, creador da banda sonora da serie, pechou un acto no que tanto a ledicia polo traballo ben feito coma o baleiro que deixa o rematar un proxecto levaron a un bo brinde con Ribeira Sacra.
Tras tres anos de traballo o proxecto Cabodomundo finalízase de xeito satisfactorio. A serie será emitida a partir do martes 16 pola cadea de televisión local que apoiou o proxecto desde o principio, Televinte, en horario de máxima audiencia. Estúdase a futura emisión a través doutras televisións locais galegas. Ainda que a serie foi creada para o público chantadino, os seus promotores consideran que o seu tratamento local de conflitos e personaxes universais faina perfectamente asumíbel para o público galego en xeral, e mesmo de outras comunidades.
O argumento da serie non é máis cá viaxe dun heroe en busca da súa identidade, que irá descubrindo a medida que se adentra no novo mundo que se lle presenta á súa chegada a Chantada e á ribeira do Miño. Javier Álvarez interpreta a un "xornalista" que chega a Chantada para negociar a adquisición das terras altas da Ribeira Sacra para a construción dun parque eólico na vila. Pero pronto as cousas vanse complicar, empezando polos estraños anónimos que recibe, cun recorte no que aparecen dúas tumbas, a de Luís Franco e a do Piloto. Unha moza (Rebeca Cedrón) que quere levar adiante a Festa das Barcas do Miño. Un adegueiro (Primitivo Lareu) que loita para conseguir os fondos do Plan Leader e poder montar unha cooperativa. Un grupo Bravú na procura da súa identidade nun medio hostil… Estas e outras historias técense cun submundo de xacias, lavandeiras, ánimas en pena, meigas e outros seres que se entrelazan cos humanos. Porque a existencia dun mundo máxico fai que o real xire, que sexa máis real.
"Estamos diante dun momento de redefinición do papel das televisións locais.", afirman dende o equipo. "Coa transición á tecnoloxía dixital, a multiplicación das canles vai obrigar ás empresas televisivas a buscar unha oferta diferenciada. Nese sentido, o principal valor que poden achegar as canles locais é a proximidade ao cidadán." Sosteñen que, coa proximidade como valor, "Cabodomundo" quere ser unha proposta doutro xeito de facer televisión máis próximo á xente e á cultura local. Unha televisión feita por e para os espectadores, paliando a escaseza de medios con imaxinación e frescura.
A orixe da serie proposta polo Cabodomundo está en Chantada. Responde a un proxecto de investigación-acción participante, a un modelo de televisión comunitaria implantado xa noutros países, no que a cidadanía accede aos medios de produción. O proxecto alimántase da idiosincrasia cultural chantadina, do rescate da súa memoria, e está feito de xeito voluntario polos propios veciños.

Web Cabodomundo

Por: Fagot | Televisión | Comentarios (0) | Referencias (0)