A peli do día

Mércores, 12 de Xullo de 2006

O documental, un formato de futuro

Información de Galicia Hoxe

O Consorcio Audiovisual de Galicia asinará hoxe coa Fundación Carlos Casares un convenio de colaboración para axudar a financiar con 21.000 euros o curso de verán que hoxe arrinca en Celanova, "Documental. Imaxinar a realidade" e unhas xornadas nas que se presentará un estudo que está a rematar o Consorcio sobre a lingua galega e o cine, con relatores nacionais e internacionais.
Ademais de asinar hoxe este convenio, o director-xerente do Consorcio Audiovisual de Galicia, Nacho Varela participará mañá no curso que se vai celebrar no Mosteiro de San Rosendo até o día 14 cunha conferencia na que presentará o proxecto "Docs" e falará sobre a venda e promoción internacional de documentais galegos.
Varela destaca a relevancia do estudo que o Consorcio está a preparar sobre o galego e o cine. "Queremos falar dunha cuestión que nos preocupa e da que se fala con pouco rigor, como é a relación do cine coa lingua e ofrecer propostas de futuro", asegura. Esta investigación será presentada nunhas xornadas, que, segundo Nacho Varela, prevén organizar a finais de setembro ou outubro en colaboración coa Fundación Carlos Casares.
Outra das iniciativas que ten en marcha o Consorcio, unha institución creada no 2001 para potenciar o audiovisual en Galicia, é o "Proxecto Docs", "totalmente pioneiro no Estado", afirma o xerente do organismo. Consiste en elaborar un catálogo de producións documentais galegas que se distribuirá nos mercados nacionais e internacionais en diferentes linguas e cun DVD que inclúa os documentais que se ofertan.
"En todo o mundo, hai uns 300 ou 400 destinos específicos para vender documentais", sinala Nacho Varela que considera que o documental galego de hoxe en día ten "boas historias e profesionais" que hai que converter en "produtos exportables".
Para o xerente do Consorcio, o documental representa hoxe "un formato con futuro" e cre que para facelo exportable, os profesionais que o realizan terán que rexerse "polo que lle interesa á xente máis que polo documental que un quere facer".

"O idioma non é un problema para exportar o audiovisual"

O idioma non é un atranco para vender o documental galego. Ao ver de Nacho Varela, "non debemos ter criterios restritivos. Existe a subtitulación e pór énfase excesiva en que a lingua condiciona a exportación non é a solución". Segundo opina, o documental galego ten que "recuperar a autoestima e aproveitar estas novas posibilidades que abren o panorama", estima.
O Proxecto "Docs" vai requirir un investimento que aínda non está fixada, pero Nacho Varela confía en que a experiencia colleitada coa iniciativa das Curtas na Rede, que asentou estratexias de distribución coas que agora poder enfocar o documental en Galicia. O convenio, que será asinado hoxe polos responsables de ambas as entidades no Mosteiro de San Rosendo en Celanova, terá vixencia ata o próximo 31 de decembro. Froito da colaboración entre o Consorcio Audiovisual e a Fundación Carlos Casares tamén se promoverán outras iniciativas encamiñadas á difusión e ó achegamento do eido audiovisual galego á sociedade.

Por: Fagot | Institucións | Comentarios (0) | Referencias (0)