A peli do día

Venres, 29 de Setembro de 2006

As repercusións dunha película "parada"

Manolo Gómez dimite do seu cargo de Presidente da Academia Galega do Audiovisual e recibe o anuncio de que vai ser denunciado polo equipo técnico e artístico por causa da paralización da rodaxe de "Os mortos van depresa"

Levamos uns días "quentiños" no entorno audiovisual galego e ó mesmo tempo incertos polo efecto dominó provocado pola decisión de Dygra de suspender a rodaxe do seu filme "Os mortos van depresa". Onte mesmo, Manolo Gómez, productor do filme, dimitía no seu cargo de Presidente da Academia Galega do audiovisual que a partires de hoxe pasa a mans da actriz María Bouzas.
Segundo o xornal Galicia Hoxe, Manolo Gómez declaraba por vía telefónica que non se atopaba "moralmente forte para facer ningún tipo de declaración", pouco tempo despois de facerse pública a súa dimisión como Presidente da Academia.
Non é para menos e é que a suspensión dunha rodaxe é un asunto máis que delicado e que só o tempo nos sabe dicir cal é a súa trascendencia.
Manolo Gómez recoñeceu a súa culpa e así se recolle nos seguintes fragmentos da súa intervención en rolda de prensa en Ribadeo publicados na Voz de Galicia:
"Está claro que son o máximo responsable desta situación e que teño que admitir que neste proxecto actuei con máis corazón que cabeza". "Unha película como esta ten uns compromisos económicos cada fin de semana que non se poden afrontar sen poñer en risco as outras liñas de produción de Dygra". "Cando puxemos en marcha a rodaxe, actuei como se fose unha película de animación, onde os compromisos económicos teñen unha temporalidade máis flexible" "Teño que asumir a culpa da inexperiencia miña no cine de imaxe real e unha planificación errónea dos tempos entre que se concretan os apoios e hai que pagar a rodaxe".
Pódese dicir máis alto pero non máis claro. Agora, a touro pasado, e despois de ler as palabras de Gómez probablemente máis de un pense que foi unha temeridade por parte de Dygra meterse nun proxecto de ficción convencional cando nin sequera chegaron a producir unha simple curta. Igual se lle pasa eso pola cabeza tamén a Manolo Gómez, que por se alguén o dubida, é a parte máis afectada neste caso.
Primeiro: Dygra suspende a rodaxe dun filme co perxuizo económico que eso supón.
Segundo: Manolo Gómez vese obrigado a dimitir como Presidente da Academia, cargo que tiña desde o 2003.
Terceiro: Se Dygra non roda o filme terá que devolver a axuda concedida pola Consellería de Cultura. E a estas alturas, con 5 días de rodaxe eses cartos poden estar máis que gastados.
Cuarto: O equipo artístico e técnico anunciou que vai denunciar a Dygra e teñen as de gañar xa que é posible que exista un incumprimento de contrato. Esto é especialmente serio, xa que se Dygra tivese que facer fronte a tódalas indemnizacións non sería de extrañar, como xa vimos noutros casos, que a empresa se plantexase a idea de declararse en quebra.
Quinto: Manolo Gómez, un productor e director que acumula 2 Goyas no seu haber, algo que non conseguiu ningún director galego (Salvo Angel de la Cruz que codirixe con el), vese obrigado a admitir publicamente que por culpa da súa inexperiencia ten que paralizar a rodaxe da súa película.
O pao é realmente serio. O mesmo Manolo Gómez afirmou que se vira obrigado a tomar unha decisión "sen precedentes". Nesto non estamos dacordo. Que se suspendan rodaxes non é un feito habitual pero acontece. O que non tiña precedentes ata o momento era comunicar publicamente esta decisión. Non sabemos se é un exercicio de honestidade ou de inocencia, por parte de Manolo Gómez (do que non nos atrevemos a falar mal porque o que lle está a pasar é unha verdadeira desgracia), o feito de convocar unha rolda de prensa na que explica os motivos da decisión. Os trapos suxos, ás veces é mellor lavalos na casa que xa se sabe que despois existe xente malintencionada que os saca a airear.
Sen embargo, Manolo Gomez optou por facer pública a súa decisión e este feito multiplica as repercusións que xa de por si ten a paralización dunha rodaxe.
A comparecencia de Manolo Gómez fai publicas unha serie de incognitas que sempre pulularon polo audiovisual galego pero que nunca soron tan evidentes como neste caso:

Primeiro: Manolo Gómez falou de inversións que non se concretaron. Posiblemente se deba a participacións de coproductores ou televisións ós que tivo a sapiencia de non mencionar. Se esto é así, a cuestión é a seguinte: Ata que punto, unha productora galega (que Dygra non é das pequenas) ten a capacidade de asumir a producción dun filme de xeito independente? Existe realmente a producción con recursos propios? Os filmes que se estrean son de productoras ou en realidade son de televisións e goberno?

Segundo: Manolo Gómez achacou á súa falla de experiencia na ficción convencional o feito de que se paralizase a rodaxe. Neste caso e xa que as axudas da Xunta se conceden case que totalmente a productores: ata que punto é lícito, ou xustificable a concesión de axudas a productoras que non contan con experiencia no campo da producción ó que se presentan? (Hai que lembrar que Dygra antes de producir "O bosque animado" fixera xa algún videoxogo como "Quickmagic" na súa factoría "Filloa records")

Terceiro: Manolo Gómez tivo a valentía de explicar publicamente a situación da súa película. Sen embargo, se repasamos a relación de axudas concedidas no ano 2005, as últimas concedidas polo PP, vemos un bo feixe de títulos dos que aínda non sabemos nada. Sabemos que algúns deles están en fase de rodaxe, ou de preproducción pero realmente: cal é a situcaión destes proxectos?, preocúpase o goberno galego de saber como se están a empregar os fondos públicos adxudicados a filmes que de momento non se sabe da súa existencia?

Nos non temos resposta a nada desto. Desde aquí simplemente nos facemos eco dunha nova triste. Desexámoslle a Manolo Gómez unha prota recuperación e que o filme poida saír adiante.

Falando exclusivamente de "Os mortos van depresa", dicir que, como anunciaba hoxe Vieiros, Manolo Gómez ofreceulle ó director Ángel de La Cruz e ó seu equipo a posibilidade de cederlle os dereitos do filme para que continúen a rodaxe, posiblemente en réxime de cooperativa.

E aínda que non sexa a mellor das situacións, deste aquí queremos desexarlle sorte a María Bouzas no seu recén estreado cargo de Presidenta da Academia do audiovisual galego.

Por: Fagot | Cinema | Comentarios (3) | Referencias (0)